ރައްޔިތުންގެ ޝަކުވާތަކަށް ޖަވާބުދާރީ ވެެވޭވަރުގެ ކައުންސިލެއް ބޭނުމެވެ.

އިހަވަންދޫގެ އާބާދީ 3000 ތިނެއް ހާސް މީހުން ހަމަވުމުން ކައުންސިލަރުންގެ ޢަދަދު 5 ން 7 ށް އިތުރުވެ ރައްޔިތުންނާއި ގުޅުންހުރި މަސައްކަތްތައް ބާރު މިނެއްގައި ދާނެކަމަށް އުއްމީދުކުރެވުނަސް އެ ފެންވަރާއި ބުންވަރު މިހާރު އިހަވަންދޫ ކައުންސިލް ގައި ތިއްބެވި ގިނަ ކައުންސިލަރުންގެ ކިބައިގައި ނެތުން އެއީ ދެން އަންނަ އިންތިހާބެއްގައި އެބޭފުޅުންނަށް ރައްޔިތުން ވޯޓު ދިނުމުގެ ކުރިން ވިސްނާނެ ކަމެކެވެ. ރަށުގެ ޢާންމު ހާލަތާއި އިޖްތިމާޢީ ފޭރާމާއި އަދި ސަރުކާރުގެ ސިޔާސަތުތައް ތަންފީޒު ކުރުމަށް ގަދަ އަޅާ މަސައްކަތް ކުރަންޖެހޭ ކައުންސިލްގައި ތިއްބަވާ މެމްބަރުން "ދުން ބުރުވައި" ސެލްފީ ގެނުމުން މައްސަލަ ނިމުނީ ކަމަކަށް ބަލައިގެން ނުވާނެެއެވެ. އެހެނީ ލާމަރުކަޒީ ޤާނޫނުން އެބޭފުޅުންނަށް މަތި ކުރުވާފައިވާ ޒިންމާތައް އެހާމެ ބޮޑެެވެ. އަދި އެކަމުގައި މުޅި ރައްޔިތުންގެ މަސްލަހަތު ހިމެނިގެން ވެއެވެ. އަޅުގަނޑާއި ތިބޭފުޅުންގެ ވެސް މަސްލަހަތެެވެ.

ލާމަރުކަޒީ ޤާނޫނަށް އަމަލުކުރަންފެށިފަހުން އަހަރުތަކެއް ފާއިތުވެގެން ދިޔަ އިރު، މި ޤާނުނަށް ރައްޔިތުންނާއި ރައްޔިތުން އިންތިހާބު ކުރައްވާފައި ތިއްބެވި ކައުންސިލަރުން އަހުލުވެރި ވުމަށް ދުވަސްތަކެއް ލިބުނު ކަމަށް ބެލެވެއެވެ. ކައުންސިލް ހިންގުމުގެ އެންމެ އިސް ޒިންމާ ނަންގަަވަނީ ކައުންސިލް ގެ ރައީސެވެ. އެހެންކަމުން، ދުވާލާއި ރޭގަނޑު "ނިދި" ޖެހިފައިވާ ބޭފުޅަކަށް އެބޭފުޅެއް ވާނަމަ، ރައްޔިތުންގެ ކައިރިއަށް ހަމަ އަންނާނީ "ހިނި" އެވެ. މިހާރު އިހަވަންދޫގެ ކައުންސިލްގެ ރައީސަކަށް ހުންނެވި ބޭފުޅާއަށް "މަސްތުވާ ތަކެއްތާ" ގުޅުންހުރި ތުހުމަތު ތަކެއް ކުރެވޭ ނަމަ، އެ މައްސަލަ ބެލެންޖެހެއެވެ. ޢިއްޒަތްތެރި މަޤާމެއްގައި ހުންނަވާ ބޭފުޅަކު "ތެޔޮ ބިޑި" ގެންގުޅުވާ ކަމަށް ރައްޔިތުން ގެ ތެރެއިން ބަޔަކު ބުނާނަމަ އެކަމުގައި ކޮންމެވެސް ކަހަލަ ޙަޤީޤަތެއް އެކުލެވިގެންވާ ކަމަށް ބެލެވިދާނެއެވެ.

ބަރާބަރު 10 މަސްފަހުން އިހަވަންދޫ ކައުންސިލަށް ލެވުނު ސިޓީއެއްގެ ޖަވާބު ލިބުނެވެ. ކަމާ ގުޅޭގޮތުން ފުލުފުލުން ފޯނު ކޯލުތައް ކުރަން ޖެހުނެވެ. ޖަވާބުދާރީވުމުގެ ގޮތުން، ކައުންސިލްގެ ރައީސް ވާހަކަ ފުޅު ދެއްކެވީ ހަމަ އެބުނާ "ނިދީ" ގެ ރާގެއް ގައެވެ. އިންސާފާއި ހަމަހަމަކަން ނެތެމުންދާ މިދިވެހިރާއްޖޭގައި، އިހަވަންދޫ ކައުންސިލުންވެސް މި އިންސާފާއި ހަމަހަމަކަން ނަގާލުމުށް މަސައްކަތްތަކެއް ކޮށްފައިވާކަން ސާބިތު ހެއްކާ އެކު ބޭނުންނަމަ ހާމަ ކޮށްލެވިދާނެއެވެ. ކައުންސިލަރަކަށް އީމެއިލް ކުރަން ނޭގުނނުކަން އަޅުގަނޑު ދެނެހުރީމެވެ. އަދި އެއީ މައްސަލައެއްވެސް ނޫނެވެ. ކުރަންނޭގޭ މަސައްކަތްތައް ކުރަން ދަސްކޮށްގެން ނަމަވެސް، އަޅުގަނޑުމެން ރައްޔިތުން ޖީ.އެސް.ޓީ ގެ ގޮތުގައި ދައްކާ ފައިސާއިން މުސާރަ ނަންގަވާގެން، ރައްޔިތުންނަށް ބާރު ސްޕީޑެއްގައި ޙިދުމަތް ދޭންވީއެވެ. ޒުވާނުން ސިޔާސީގޮތުން ބާރުވެރި ކުރުމަށް ގިނަ ގުނަ މަސައްކަތްތަކެއް ޢަމަލީ ކޮށް ކުރެވުނު މީހެއްގެ ހައިޝިއްޔަތުން ބުނެލަން ބޭނުންވަނީ، ޒުވާނުނުން އިހަވަންދޫ ސިޔާސީ ވެށީގައި ހަރަކާތްތެރިވުމުން ރައްޔިތުންނަށް ލިބެން ޖެހޭ އުފާވެރިކަން ނުލިބޭ ކަމެވެ.

މަޤާމާއި ، ބާރާއި ނުފޫޒަކީވެސް ދުނިޔެމަތީގައި އިންސާނާ އިމްތިހާނު ކުރުމަށް މާތް ﷲ މިންވަރު ކުރައްވާފައިވާ ކަމެއް ކަމަށް ޤަބޫލުކުރަންޖެހެއެވެ. ތާާއަބަދު މި ކަމުގައި ދެމިތިބުމަށް މަސައްކަތްކުރުނީ އިންސާނާ މަގު އޮޅުވާލާނެ ކަމެކެވެ. ގަދަ ބަސް ބުނުމާއި، ގޮތްދޫނުކުރުމާއި، ހުރިހާ ނިންމުންތަކެއް ސިޔާސީ ގޮތުން ނިންމުމުގެ ޙިޔާލު ދޫކޮށްލައި "ހުދު ވަލު" ގައި ކައުންސިލަރުން ހިފަންޖެހެއެވެ. މިއީ ރައްޔިތުން ތިބޭފުޅުންނަށް އެއްލާލައިފައިވާ "ހުދު ވަލެ" ކެވެ. އިހަވަންދޫގެ ޒުވާނުން ސިޔާސީ ގޮތުން ތަޞައްރަފު ފުދޭ ދުވަސް ކައިރި މާޒީގައި ފެންނާނެއެވެ. އަޅުގަނޑުމެން އެންމެންވެސް ދަސްކުރަނީ ކުރިން ހެދުނު ގޯސްތަކުން ނެވެ.