ދިވެހި ރާއްޖޭގެ ސިޔާސީ ވެށި

A photo of Old Hulhule' - Maldives as it is

ބައެއް ފަހަރު ނުދައްކާ ހުންނަ ވާހަކަތައް ފުން ވިސްނުމަކަށް ފަހު ދައްކަން އަމިއްލަ ޟަމީރު މަޖްބޫރު ކުރުވައެވެ. ޤުދުރަތީ ރީތިކަން ލިބިފައިވާ މި ހިތްގައިމު ވަޠަނަށް މި އަދު މި ވަނީ   ފިޅުވާލަން އުދަނގޫ ސިޔާސީ "ވައިރަހެއް" ގެ އަސަރު ކޮށްފައެވެ. މިއީ މިއަދު ކުއްލިއަކަށް ކުރިމަތިވި ކަމެއްނޫންކަން ވަރަށް ސާފެވެ. މިއީ، ރައްޔިތުންގެ ފަރާތުން ފެނުނު ނާތަހުޒީބާއި، އަމިއްލަ އެދުމާއި، ދުނިޔަވީ މަންފާތައް އިސްކޮށް ދިރިއުޅުންކުރިއަށް ޒަމާން ތަކަކަށް ވަންދެން ގެންދިއުމުން ދިމާވި ގޮތެވެ. 

އިދިކޮޅު ސިޔާސީ ޙަރަކާތެއް ދިވެހިރާއްޖޭގައި ރައްޔިތުންނަށް ފައިދާވާ ގޮތަށް މިއިން ޒަމާނަކު ހިންގިފައި ނެތުމަކީ، ރާއްޖޭގެ ސިޔާސީ މަޝްރަހުގެ އިދިކީލަ ކަން ނުހަނު ހާމަ ކަން ބޮޑު ގޮތެއްގައި ދައްކުވައިދޭ ކަމެކެވެ. ވެރިކަން ކުރާ ޕާޓީ އަށް އިދިކޮޅު ސިޔާސީ ހަރަކާތް ފަސޭހަކަމާއެކު ކޮންޓްރޯލް ކުރެވި ހެދުނީ މުޅީންވެސް ވަކި ބަޔަކަށް ފައިދާވާ މާލީ ޑީލް ތަކެވެ. ނަމުން ސިޔާސީ ލީޑަރުންގެ ގޮތުގައި ފާޅުވީ، ވިޔަފާރިވެރިންނާއި ދީނަން ފުރައްސާރަ ކުރާ ރަބޯ ތަކެކެވެ. ދައުލަތުގެ ގުނަންތައް ވެރިކަމުގެ ނިޒާމުން ކޮންމެ ފަހަރަކުމެ ޕެރަލައިޒް ކޮށްލާ ދިވެހި ދިދައިގެ ބުރަކަށިން "ހަން" ދުއްވާލައެވެ. ކޮންމެ ސަރުކާރަކުންވެސް ޕްރޮމޯޓު ކުރަމުން އައީ "ސިސްޓަމް" މައްސަލައެއްގެ ގޮތުގައި އެވެ. ނަމަވެސް، ހަޤީޤީ މައްސަލަ އަކީ ސިޔާސީ ލީޑަރުންގެ ގޮތުގައި ފާޅުވި އިންސާނުންނެވެ.

ކޮންމެ ސިޔާސީ ޕާޓީއެއްގެ ހިންގާ އަސާސީ ޤަވާއިދުގައި ޑިމޮކުރަޓިކް ހަމަ ތަކުގެ ވާހަކަ ތައް ވަރަށް ފުރިހަމަ އަށް ލިޔެވި ފައި ވީ ނަމަވެސް، ރާއްޖޭގެ ސިޔާސީ ވެށިން ފެނުނީ ކޮންމެ ގޮތަކުންވެސް "ވެރިކަން ދިފާއު ކުރުމާއި" އަދި
"ވެރިކަން ކުރުމުގެ" ވިސްނުމެވެ. ނުފޫޒު ގަދަ ކަމަށް ބުނާ ސިޔާސީ ލީޑަރުން ސިޔާސީ ޕާޓީތަކުގައި އިސް ސަފުގައި ހަރަކާތްތެރިކާ ސިޔާސީ ފަރާތްތަކަށް ޖާއިޖު ގޮތުންނާއި އަދި ނާޖާއިޖު ގޮތުން ހޯދާއި ދޭ މަންފާ ތަކުގެ ހަދިޔާއަކަށް ވެގެން ދިޔައީ އެމީހުންގެ މަޤާމު ދިފާއު ކުރުމެވެ. ކޮންމެ ސަރުކާރުން، ކޮންމެ ސިޔާސީ ޕާޓީއަކުންވެސް، މައްސަލަގޯސް ޤައުމުގެ ހަމަޖެހުން ގެއްލޭ ހިސާބަށް ދިއުމުން ދެން މާނަ ކުރަން ފަށަނީ ދިވެހި ބަހުން ލިޔެވިފައިވާ ދިވެހިރާއްޖޭހެ ޤާނޫނު އަސާސީ އެވެ. ޤާނޫނު ހަދާ މަޖިލީހުގެ އެތައް ދައުރެއް މި މާނަ ކުރުން ތަކުގައި ހޭދަކޮށް މަޑު މަޑުން ރައްޔިތުން އަނެއްކާވެސް "ވަރުބަލި" ކުރުވައެވެ.

ސިޔާސީ ޕާޓީތަކުންނާއި ސަރުކާރުތަކުން ދެކުނީ، ތަރައްޤީ އަކީ ލޯނު ފައިސާ އެކަނި ހޯދޭ އެއްޗެއްގެ ގޮތުގައިއެވެ. ޤައުމަށް ރައްޔިތުން ދައްކާ ޓެކްސް ފައިސާ ހަމަ ހަމަ ކަމާއެކު ރައްޔިތުންގެ ކައިރިއަށް ޙިދުމަތުގެ ގޮތުގައި ނާދެއެވެ. އަމިއްލަ ރަށް ފުށުގެ ދިރިއުޅުމަށް އަޅާ ނުލެވި، ޤައުމުގެ ގިނަ ރައްޔިތުން ޢިލްމާއި، ޞިއްޙީ ހިދުމަތްތަކުން އެއްކިބާ ކުރެވުނެވެ. ސިޔާސީ ޕާޓީތައް ހެދުމާއި ، ސިޔާސީ ހަރަކާތް ހިންގުމަކީ ރިސޯޓުތަކުގެ ވެރިން ކުރަންޖެހޭ ކަމެއްކަން ސަރުކާރަށް ބުނެވުނެވެ. ނަތީޖާއަކަށްވީ، ވެރިކަމުގެ ބޭނުމުގައި ވިޔަފާރިވެރިންގެ މިލްކިއްޔާތު ބަނދެލުމެވެ.

ނަތިޖާ އަކީ ކޮބައިތޯއެވެ؟ ވެރިކަންކުރުމަކީ ނުފޫޒަށް ބަދަލުވެގެން ދިއުމެވެ. ވަޒީފާގެ މާހައުލުގައި ބިރުވެރިކަމެވެ. ކުއްތައް އިތުރުވެ، އިޖްތިމާޢީ ފޭރާން ނިކަމެތި ވުމެވެ. ކުރުކޮށް ބުނާ ނަމަ، އިސްލާމް ދީނާ ދުރަށްދާ މުޖުތަމަޢު އެއް އުފެދި ، ދީނީ ބައިބައިވުންތައް ކުރިލައި ހެދި، ދީނީ ޢިލްމުވެރިންނަށް އޮތް އިތުބާރު ގެއްލިގެން ދިއުމެވެ.  

ވުމާއެކު، މި އަދު ކޮންމެ ރައްޔިތަކު ނިންމަންޖެހޭ ނިންމުމެއް އެބަ އޮތެވެ. އެއީ، ތާ އަބަދަށް ރާއްޖޭގައި ސިޔާސީ "ހަށިވިއްކުން" ބާއްވާނީތީ ނޫނީ އެކަން ނައްތާލާނީތޯ ރައްޔިތުން މިއަދު އަމިއްލަ ޟަމީރާ ސުވާލު ކުރަން ޖެހެއެވެ.