އިހަވަންދޫ ސްކޫލު

 

ފަޚްރުވެރި ތާރީހެއް އޮތް، އިހަވަންދޫ ސްކޫލު އަހަރެންނެކޭ އެއްގޮތަށް ގުޅެނީ ކުރީގެ ހަރުމީހުންނާއި، މިއަދުގެ ޒުވާނުންނާއި އަދި މާދަމާގެ ޅަދަރިންގެ އުނގެނުމާއި ތަރުބިއްޔަތުގެ ކާރުހާނާގެ ގޮތުގައެވެ. ތަޢުލީމާއި ތަރުބިއްޔަތުގެ އާރޯކަން އިހަވަންދޫގެ އިތުރުން، ހއ، އަދި ހދ  ގިނަ ރައްޔިތުންނަށް ހުއްޓުމެއް ނެތި ލިބުނެވެ. އަތޮޅުގެ އެންމެ އާބާދީ ބޮޑު ސްކޫލުގެ ގޮތުގައި 2009 ވަނަ އަހަރު 1248 ދަރިވަރުންނާއި 120 މުވައްޒަފުންނާއި އެކު ވާއިރު، މިއަދު މި ޢަދަދުތައް މަދުނަމަވެސް، ހިދުމަތްތެރިންގެ ގޮތުގައި ގިނަ އިހަވަންދޫގެ ޒުވާނުން ތައުލީމީ ދާއިރަށް ނުކުމެ މަސައްކަތް ކުރާ ކަމަކީ ނުހަނު އުފާކުރާކަމެކެވެ.

ސްކޫލެއްގެ މައިގަނޑު ދައުރަކީ މުޖުތަމަޢުގައި ތަޢުލީމު ހަމައެކަނި ފޯރުކޮށްދިނުން ކަމަށް ބަލައިގެން މި ބަވަނަވަމުންދާ ދުނިޔޭގައި އަހަރެމެންގެ ލޯތައް އެހެން ދިމަދިމާލަށް ނުހުޅުވާ ތިބެވޭކަށް ނެތެވެ. އިސްލާމު ދީނާއި ގައުމިއްޔަތު ހިމާޔަތްކުރަން ޖެހެއެވެ. މީހުންގެ ހައްގުތަކާއި މުދަލަށް ރައްކާތެރިވާންޖެހެއެވެ. އަބުރާއި އިހްތިރާމް އެއީ އޮންނަށްޖެހޭ އެއްޗެއްކަމަށް ގަބޫލުކުރަންޖެހެއެވެ. އަޅުކަންތައްތައް ކުރަންވީ ތަރުތީބާއި އުޅުމާއި ގުޅުން ބަށްޓަންކުރަން ޖެހެއެވެ. ތިމާވެށި ހިމާޔަތް ކުރަންޖެހެއެވެ. އަމިއްލަ ނަފުސަން ލޯބިކުރުމާއި އާއިލީ ރަހިމުގެ ގުޅުންތަކުގެ ވާހަކަ ދެކެވެން ޖެހެއެވެ. މިހުރިހާ ކަމެއްވެސް، ސްކޫލަކުން ފޯރުކޮށްދެވޭނީ ، ތައުލީމުގެ ތެރެއިން ތަރުބިއްޔަތަށް އިސްކަން ދެވިގެންނެވެ. ތަރުބިއްޔަތަކީ ހަޤީގީ ތަޢުލީމުގެ ބިންގާ ކަމަށް ބުނަމެވެ. ވީމާ، ތަޢުލީމެއް ފޯރުކޮށްދިނުމުގެ އިތުރުން ސްކޫލަކުން އަދާކުރާ ދައުރުގެ ތެރޭގައި، ތަރުބިއްޔަތު ބަށްޓަންކުރުމާއި، ޞިއްހަތާއި ތިމާވެށި ހިމާޔަތްކުރުމާއި، ބެލެނިވެރިންގެ ވިސްނުމަށް ހެޔޮ ބަދަލުގެނައުމާއި، އިސްލާމް ދީނާއި އަޅުކަންތަކަށް މުޖުތަމަޢު ހޭނުވުމާއި، ކުޅިވަރާއި ކަސްރަތު އިސްލާމީ ގިޔޮގަނޑުގެ ތެރޭގައި ކުރިއަށް ނެރުމާއި، އަމިއްލަ ނަފުސުގެ މަތިވެރިކަމާއި މުއްސަނދިކަން އެންމެ ރައްޔިތުން ނަށް ބުނެދިނުން ހިމެނޭކަމަށް ބުނެވޭނެއެވެ.

މިދެންނެވުނު މަގުން މަގްޞަދު ހާޞިލް ކުރުމަށް ބޭނުންވަނީ، އެކުވެރި މާހައުލެއްގައި މަސައްކަތްކުރާނެ، އެންމެނަށް އިހްތިރާމުކުރާ ހިދުމަތްތެރިން ތަކެކެވެ. އަދި މި ޙިދުމަތްތެރިންނަށް މަގު ދައްކައިދޭނެ ރަނގަޅު ލީޑާރޝިޕެކެވެ. މި ލީޑާރޝިޕް ވާންވާނީ މަސައްކަތުގެ މާހައުލުގައި “ބޮޑާ” ކަން ނުދައްކާ އެ ސިފައަށް ނޫނެކޭ ބުނާ ލީޑަރޝިޕަކަށެވެ. މަގާމަށް މަސައްކަތްކުރާ ބަޔަކު ލީޑަރޝިޕްގައި ތިބޭނަމަ، އަބަދުވެސް ފެންނަމުންދާނީ، މަސައްކަތުގެ ރޫހުގައި މަސައްކަތްކުރާ މުދައްރިސުންނާއި މުވައްޒަފުންގެ ޝައުގުވެރިކަން ގެއްލި މަސައްކަތަށް ފޫހިވާ މަންޒަރެވެ. މަސައްކަތުން ރެކި “ވީހާހެއްލަވާން” ދޫކޮށްލާ މަންޒަރެވެ. މުވައްޒަފުންގެ މެދުގައި ތަފާތުކުރެވި، މީހުންގެ ޒާތީ ދިރިއުޅުމާއި ހަމައަށް ހިތްހަމަ ނުޖެހުމާއި މަސައްކަތުގެ ވާހަކަ ތަކުގެ ކޮޅުތައް ދުވާ މަންޒަރެވެ.

ބާރުގެ ބޭނުންކުރުމާއި، މަގާމުގެ ނާޖައިޒުގެ ފައިދާ ބޭނުންކުރުމުން ހުދު ތިމާއަށް އޮތީ ކޮން ފައިދާއެއްތޯއެވެ؟ އިސާހިތަކު ބުޅާ ގޯނިން ބޭރުވެ، މީހާ ފަޟީލަތްވެ، އެހެން މީހުންގެ ކުރިމަތީގައި ތިމާގެ އަގު ވެއްޓޭތަން ފެނެއެވެ. ހަނދާންކޮށްލައްވާށެވެ. ދުނިޔެއަށް އިރު ކޮންމެ ދުވަހަކު އަރަނީ އެކި ވަގުތުއެވެ. އަދި އެ އިރު ގެ ހޫނިމިން ތަފާތުވެ ، އިރުގެ ދޯދިތައް ދަތުރުކުރާ މިސްރާބު ތަފާތެވެ. ދުނިޔެއަކީ ހަމައެކަނި ހިނގަ ހިނގާ އޮންނަ ތަނެއް ނޫނެވެ. ތަބީޢީ ކަނޑައެޅިފައިވާ ނިޒާމެއްގެ ތެރޭގައި ހިނގަ ހިނގާ އޮންނަ ދުނިޔެއެވެ. އާރާއި ބާރު އަދި މަގާމު އަބަދަކު ނޯންނާނެއެވެ. ހަމަ ނޯންނާނެއެވެ.

ލީޑަރޝިޕްގެ ކޯޅުމަކީ މުވައްސަސާއެއްގެ ހަލާކެވެ. އެ މުވައްސަސާއެއްގެ ކުރިމަގު ގިނަ ޒަމާންތަކަކަށް ބަންދުކޮށްލައެވެ. އައު އީޖާދާއި ހިޔާލު ނެތި ކޮށްލައެވެ. އައު މީހުންނަށް ފުރުޞަތު ގެއްލުވާލައެވެ. ޚަރަދު ބޮޑުވެ، ހިންގުމުގެ ނިޒާމު ބޮއްސުން ލައެވެ. ބޮޑާކަމާއި ކިބުރުވެރިކަމާއި މަގާމުގެ މަތިން މީހާއަށް ހަނދާންކޮށްދެއެވެ. މުވައްސަސާގެ ކުރިއެރުމަށްވުރެން ތިމާގެ ޒާތުގެ ކުރިއެރުން ތިމާގެ ސިކުނޑިއަށް ވައްދައި ދެއެވެ. މިއީ ބައްޔެކެވެ. އަމިއްލަ އެދުމުގެ ބައްޔެވެ. މިބަލީގައި މުޅި ހަޔާތް ވޭތުކުރަން ބޭނުންވާނީ ކާކު ހެއްޔެވެ؟ މުޖުތަމަޢުއިންގެ އިންސާނާއަށް ލިބޭ ގަދަރާޢި ، އިހްތިރާމާއި، އޯގާވެރިކަމާއި، އިހްސާންތެރިކަމުގެ އިހްސާސުން ފިނިކަން ގެނެސް ނުދޭ، ރޮއްވާ ނުލައި ކޮންމެ ހިތަކީ ” ކިލަނބުގެ ހިތެކެވެ” އެ ހިތް ވަނީ ގާވެފައެވެ. ނަފުރަތާއި ރުޅިވެރިކަމާއި ހަސަދައިންނެވެ.

އަހަރެންނަކީ، އިހަވަންދޫ ސްކޫލު ހިންގުމުގެ އަހަރުތަކެއް ތަޖުރިބާ ވަރަށް ޅަ ދުވަހު ކުރި ޒުވާނެވެ. އެ ދުވަހު ކުރެވުނު އިހްސާސް މިއަދުވެސް މި ކުރެވެނީ ހަމަ އިއްތިފާގަކުން ތޯއެވެ؟ ހަމަ އެހާމެ ފުން ތިން އިހްސާސް އެވެ.

ލީޑާރޝިޕްގެ ކޯޅުމާއި ބޮޑާކަން
މަގާމަށް ކެނޑިނޭޅި މަސައްކަތްކުރުން
ރަނގަޅަށް މަސައްކަތްކުރަން ބޭނުންވާ މީހާ ފޫހިކޮށްލުން

އިހަވަންދޫ ސްކޫލުގެ ކުރިމަގު އެދެވޭ ދުވެލީގައި ކުރިއަށްދާން އޮތީ މި ދެންނެވުނު ކަންތައްތައް ލީޑާރޝިޕުންނާއި މެނޭޖުމަންޓުން ރަނގަޅު ކޮށްގެންނެވެ. އިހަވަންދޫގެ ތަރައްގީ އާ މެދު އަހަރެން އަބަދުވެސް ފާރަވެރިވަމެވެ. އިހަވަންދޫގެ ތަރައްގީގެ އެންމެ ބޮޑު އެއް ބަހާ އަކީ އިހަވަންދޫ ސްކޫލެވެ.