އިހަވަންދޫ ގައި ޘަޤާފީ ޢީދެއް – ޢީދު ވެދުމާއި ދިއުން



ރަށުގެ އިސްވެރިޔާގެ އަރިއަހުން ޢިދު ކުޅެން ހުއްދައަށް އެދެނީ

ކޯޑި ކުޅިވަރުގެ ކުޅުންތެރިން

އަޅުގަނޑު މަސައްކަތް ކުރާ އޮފީހުގައި ކަންދިމާކުރި ގޮތުން، މިއަދު (ޢީދު ދުވަހުގެ) ހަވީރު 4 ޖަހާކަންހާއިރު ކުޑަ ރަސްމީ މަސައްކަތެއް ކޮށްލަންޖެހުނެވެ. އިރުމަތީ ފަރާތުގެ ގޭޓާއި ހިސާބުން، ބާރު ބެރުތަކުގެ އަޑުތައް "ޢީދުކުޅެން" ކެތް މަދުވެފައި ތިބި ޅަޒުވާނުންގެ އަޑާއި އެކު ކަންފަތުގައި އެވަގުތު ބީހެމުން ދިޔައެވެ. އެންމެފަހުން، ހިތް ބޭނުންވީ މިވާގޮތެއް ބަލާށެވެ.

އިމަގު ޖަމްޢިއްޔާގެ ފަރާތުން ބޭއްވި ކުޑަކުދިންގެ ޢާއިލީ ހަވީރު

ބޭރަށް ނިކުމެ ބަލާލިއިރު ފުރަތަމަވެސް ފެނުނީ ދެކެން ވަރަށް ބޭނުންވެފައި ހުރި އެއްޗެކެވެ. އެއީ ޘާޤާފީ ގޮތަށް ތައްޔާރުކުރެވިފައިވާ ނަލަ ކޯޑި އެކެވެ. އޮފީސް ލެއްޕުމަށްފަހު ކޯޑި ކައިރިއަށް ދިޔައީ ހަމަކޯޑިވެސް ރީތިވީމައެވެ. ކިޔާ ލަވަވެސް ރީތި ވީމައެވެ.

ދެން އޮތީ ޢީދު ވެދުމާއި ދިޔުމެވެ. ބުނެވޭގޮތުގައި މިއީ، ރަށުގެ އިސްވެރިޔާގެ ފަރާތުން ޢީދު ކުޅިވަރު ކުޅުމަށާއި އުފަލާއި މަޖާކުރުމަށް، ރަށުގެ ރައްޔިތުން ކޯޑި ހިފައިގެން، ބޮޑުބެރާއި ލަވާގައި ހުއްދަ އަކަށް އެދި ދާ ދިއުމެވެ. ކޯޑި މަގުތަކުގައި ދުއްވާލުމާއެކު، ކުދި ބޮޑު އެންމެން ކޯޑީގެ ހަރަކާތަށް ސަމާލުކަން ހުއްޓިއްޖެއެވެ.

ރަށު ކައުންސިލްގެ ރައީސް މުހައްމަދު ސަމީރު ދިރިއުޅުއްވާ ގެކޮޅަށް، ރަށުގެ ރައްޔިތުން ކޯޑީގައި ކޯޑިނެށުމުގައި ދިޔައެވެ. އަދި ކޯޑި ގްރޫޕުގެ އިސްފަރާތެއް ވަރަށް ޢަދަބުވެރިކަމާއިއެކު، ކައުންސިލްގެ ރައީސްގެ އަރިއަހުން އެދުނެވެ.

"އަޅުގަނޑުމެން މިއައީ 1432 ވަނައަހަރުގެ ޢަލުހާ ޢީދު ފާހަގަކޮށް އުފާ ފާލުކުރުމާއި ކުޅިވަރު ކުޅުމަށް ހުއްދައަކަށް އެދެންވެގެން. ވީމާ، އަޅުގަނޑުމެންނަށް އެ ހުއްދަ ދެއްވުން އެދެމެވެ."

މަގުތަކުގައި ކޯޑި ދައްކާލަނީ

ހަމަ އެއާއެކު، އިހަވަންދޫ ރަށުކައުންސިލް ގެ ރައީސް މުހައްމަދު ސަމީރު ވިދާޅުވި ބަސްފުޅަކީ،

"އިސްލާމު ދީނާއި ، ދިވެހިރާއްޖޭގެ ޤާނޫނު އަސާސީއާއި އަދި ހެދިފައިވާ އެންމެހާ ޤާވާޢިދުތަކާއި ފުށު ނާރާގޮތަށް، ރަށުގެ އަމަންއަމާންކަން ނުގެއްލޭގޮތަށް ރަށުގެ މަސްލަހަތަށް ބެލިގެން ޢީދުގެ އެންމެހާ ކުޅިވަރުތައް ކުޅައުމަށާއި އުފާފާޅުކުރުމަށް ހުއްދަ ދީފީމެވެ."

އެހިސާބުން ދެން އިވުނީ އެއްވެތިބި، އެންމެހާ ރައްޔިތުން އުފަލުން އަތްތިލަ ބަޑީގެ ތަރުހީބު ދިން އަޑެވެ. އަދި ކޯޑި ގްރޫޕުގެ އިސްފަރާތުން ރަށުގެ އިސްވެރިޔާއަށް ޝުކުރު ޢަދާކުރުމަށްފަހު، ކޯޑީގެ ލަވަ އެހާ ހިސާބުން ބަދަލުކޮށް ރީތި ބެރާއި ހަމަ ނެށުމުގައި ރަށު ތެރޭގައި ކޯޑި ދަށްކާލާފިއެވެ.

ރަށުގެ އިސްވެރިޔާ ގެކޮޅާއި ދިމާއަށް ކޯޑި މިޝްރާބުޖަހާފައި.

އެވަގުތު، އިހަވަންދޫ މަސްވެރިންގެ ގުޅުމުގެ ޖަމާޢަތުގެ ފަރާތުން ޢާއިލީ ކުޑަކުދިންގެ ހަވީރެއް ރަށުގެ ރަސްމީ ސްޓޭޖުގައި ކުރިއަށް ގެންދިޔައެވެ. ޢީދުގެ ހަރަކާތްތަކަށް ވަރަށް ބޮޑު ތަރުހީބެއް ހުރިހާ ރައްޔިތުންވެސް ދެމުން އަންނަކަން ފާހަގަކުރެވުނެވެ. އަދި މަޢުލޫމާތު ލިބޭ ގޮތުގައި މާދަމާވެސް، ކުރު ދަޑިއާއި، ދިގުމަގު ދަޑިއާއި އަދި މިރޭއިން ފެށިގެން 3 ރޭ ވަންދެން ރޭގަނޑުގެ ސްޓޭޖް ޝޯގެ ހަރަކާތްވެސް ކުރިއަށް ދާނެއެވެ.

ރަށުގެ ތާރީހާއި ޘަޤާފަތާއި އާދަކާދަތައް ދިރުވުމަށްޓަކައި އިހަވަންދޫ ސްކޫލުގައި "ކަލްޗަރަލް އެންޑު ހެރިޓޭޖު" ކުލަބެއް އުފެއްދުމުގު މުހިއްމުކަން އަޅުގަނޑަށް އިހުޞާސް ކުރެވުނެވެ. އަދި ކުރިއަށް ހުރި ބައްދަލުވުންތަކަށް މި ހިޔާލުވެސް ހުށަހަޅާނަމަވެ.